首屆博鰲青年論壇喺呢個月七號揭幕，成功爭辦論壇嘅香港菁英會高層尋日開記招，預告星級講者名單。論壇搞得成，籌委會主席霍啟剛承認歷盡考驗，一度驚經濟差搵唔到贊助；菁英會主席兼論壇籌委會顧問施榮忻就話，當初發信邀請名人出席時曾畀人「睇小」，質疑論壇講者名單「冇咁堅」，幸好呢班後生仔證明一樣有能力搞博鰲級數嘅論壇。
呢次論壇以「金融危機下的中國外交、經濟與文化」為題，請嚟十六位講者分享高見，當中包括國家前外交部長李肇星、博鰲亞洲論壇秘書長龍永圖同交通銀行董事長胡懷邦等，聽政商界猛人傳授秘笈，幾百位港澳台青年人同大專生都話擔定櫈仔聽書，論壇由朝九至晚六，出席者要抖足精神至得。
