經濟動力尋日召開記者會，核心嘅「3L」林健鋒、梁君彥同梁劉柔芬都冇現身。胡兆英唱獨腳戲，都係強調高鐵可帶動跨境人流，對旅業同整體經濟有利，仲話暫時冇乜具體行動撐高鐵。內容咁空洞，似乎想突出自己係旅業代表身份，多過要同菜園村居民對決。

有記者問佢，開記者會係咪為聽日嘅旅議會選主席拉定票，佢笑笑口咁話冇關係，亦唔回應有冇興趣選立法會，只係話目前最緊要做好業界嘅事情。

旅議會現任主席何柏霆同總幹事董耀中都係富貴黨黨員，聽日換屆選舉，胡兆英被看高一線，若然勝出，旅議會嘅富貴黨時代將會結束，由經濟動力取而代之。據聞，經濟動力更有意挖埋董耀中過檔，全盤接收富貴黨地盤。

但有旅遊業人士分析，胡兆英做咗旅議會主席，唔代表能夠贏到立法會議席，事關旅議會近年制訂種種規條規管業界，得失唔少行內人，上年立法會選舉，謝偉俊就係憑攻擊旅議會而得唔少分，經濟動力同富貴黨互鬥分薄票源，對謝偉俊更有利添！