貝爾吉塔公主嘅細佬卡爾十六世（Carl XVI Gustaf）就係當今嘅瑞典國王。大會安排瑞典傳統嘅鋸木儀式同代表香港嘅舞獅表演作為開幕禮嘅重頭戲，起初公主見到啲獅子都表現得好好奇，幫佢哋點睛後仲係咁拍打獅子個頭，但當啲獅子開始上杆準備採青時，公主一路睇就一路皺住眉頭；當獅子完成採青，將口中嘅生菜吐出嚟嗰陣，公主仲好似唔太受落添，睇嚟畀舞獅嚇親。

開幕禮後，公主巡視店舖時，對住啲日見夜見嘅傢俬同日用品似乎唔太感興趣，走馬看花咁好快就睇完，反而好鍾意現場小丑送畀佢嘅扭扭狗氣球，臨走時仲拎咗兩個放入手袋帶返屋企。