工聯會係本港最大嘅工會，會長鄭耀棠尋日同傳媒茶敍時，少不免被問到泛民搞五區總辭呢場鬧劇，之不過，工聯會似乎無心裝載，棠哥更寸白鴿黨、公文袋同社民連，好似滾水淥豬腸咁，喺出戰一事上輪流鬥縮。

工聯會搵嫻姐做校長

原來喺棠哥眼中，三黨都只不過係豬腸一條，好打極有限。跟住佢仲順手公布埋工聯政務委員會依家搵緊地方辦培訓新人嘅學校，目標喺總部之外，五大選區各設一間分校，校長人選竟然係陳婉嫻。

政壇盛傳，一旦泛民嘅五區總辭成事，曾經做過九東票后嘅嫻姐極有可能要披甲上陣出戰九東，呢個時候工聯會仲叫嫻姐做「校長」呢樣咁粗重嘅工作，就證明棠哥根本唔將泛民總辭放喺眼中啦，亦睇死五區總辭虎頭蛇尾。

棠哥呢邊廂睇淡泛民嘅五區總辭搞唔成，但另一邊廂又擔心政改諮詢方案被否決。棠哥透露打算成立一個「政制向前走大聯盟」，為幫手推銷政改諮詢文件出力，構思中聯盟成員有廣泛代表性，「唔想見埋都係識得嗰幾個」，仲會要求成員團體各自搞班，向會員講解諮詢方案嘅內容，同埋收集意見，當係全民上一課公民教育。至於民主派咬住唔放嘅功能組別存廢問題，對唔住，非課本範圍。

棠哥擺明同泛民打民意戰啫！其實○五年政改方案之爭，又係由工聯會擔旗發動全港性簽名支持運動，今次再搞規模有過之而無不及嘅「政制向前走大聯盟」，棠哥話全因有好多商界同專業人士游說佢出嚟做啲嘢抗衡泛民，以免政制發展又原地踏步，但佢又怕一旦同泛民「起槓」，會激起社會兩極分化，所以依家個心十五十六，要一個禮拜後至最後拍板咁話。