小白觀點：另類遊歷更貼近民情

外國雜誌網站推薦遊港必做「十件事」，以為有乜咁好介紹啦，唓！咪又係上山頂睇風景、行廟街買手信、去茶樓一盅兩件歎茶嗰啲，悶唔悶啲呀？仲有呀，早前有外國媒體將新光戲院睇大戲當係遊客不容錯過嘅亞洲體驗之一，係人都知呢個粵劇殿堂就嚟執，我懷疑九成九旅發局得罪咗人哋嘅老總，唔係點會咁靠害？

如果各位有朋友嚟香港玩，不如試吓帶佢哋睇吓八十歲阿婆當街推郁比自己重十倍嘅紙皮、跟警察一齊橫掃油尖旺架步、去深水埗睇蛇王乜劏蛇取膽以及坐水警輪去蒲台島歎海鮮吖！不過最精彩嘅，都係欣賞吓政客動物點樣自相殘殺狗咬狗骨，咁至不枉此行。

網友觀點......

BB King

外國雜誌識乜吖，梗係寫埋啲官方嘢，唔通介紹馳名嘅深水埗公廁多嘢睇咩！

喜瑪拉阿星

haaa，其中介紹去重慶大廈觀摩，去到畀人摸就有份，仲唔嚇鬼死咩！

kenny

香港人多車多，叫佢去旺角逼吓就知咩叫地道特色喇。

Lo B

點解冇介紹香港獨有嘅純種「港女」o架，去各大快餐店可能撞到一兩個，到時記得拍片留念呀！

網址：www.sunsiupak.blogspot.com

阿豪觀點：老外賣口乖另有目的

美國《時代周刊》網站向旅客介紹遊港十件必做嘅事，睇落好似冇乜驚喜，反而各位網友同小白兄嘅「另類遊港指南」就極有創意，睇嚟豪伯都無謂喺度狗尾續貂啦，一來無謂獻醜，二來就算諗得再好又點吖，旅發局又唔會畀番錢你嘅。

諗諗吓，老外無啦啦賣口乖，到底有咩目的？近排《時代周刊》以「美國要向中國學習嘅五件事」為封面古仔，落足鞋油，連中國教育制度都讚一大餐，話中國學生平均叻過美國學生好多，無非都係「捧殺」，等你哋中國人鬆毛鬆翼，出手拯救世界兼繼續買多啲美國國債。所以計我話，香港應該立即大事宣傳「死前必到嘅十大新加坡景點」就差唔多！

網友觀點......

一條水草

去旺角買老翻。

杰達達

使乜搭直升機呀，搭天星小輪都得啦，又平又有特色，加送濃烈機油味，我今日先搭完！

濠仔帶你玩

去旺角掃街頭小食啦，最代表到香港人嘅飲食文化，啲外國人睇見啲牛雜豬雜唔知敢唔敢食呢？

卜勤

去旺角淋老鏹大街同白田邨鐵錘道，感受高空擲物嘅威力。

網址：www.lukchiho.blogspot.com