話說首次懷孕嘅莫太，喺懷孕六周時去廣華醫院檢查，發現輸卵管有陰影。醫生話係宮外孕，情況危急，要即時做手術。宮外孕分分鐘都會死人，唔可以講笑㗎，惟有接受手術啦。

點知手術期間，醫生發現根本唔係宮外孕，而係輸卵管生咗個小水泡，但係又冇停止手術，照幫孕婦刮宮。醫生事後仲對莫太講，佢嘅子宮同輸卵管都好健康，唔做手術對胎兒都冇影響咁話，好似乜嘢事都冇發生過咁。

大佬，個胎係一條生命嚟㗎，點可以咁兒戲呀！莫太辣慶，狂炳院方未經佢同意就落咗個胎。呢鋪個醫生先識驚，改口話個胎唔健康，所以要刮宮。

你估人哋係三歲細路咩，一聽就知道係砌辭狡辯啦。嗱，有婦產科專科醫生話，宮外孕最常發於懷孕第八周，一般私家醫生如果懷疑孕婦有宮外孕，會觀察一段時間，檢查有冇肚痛、陰道流血、盆腔積水等病徵，然後先確診。不過，莫太懷孕六個禮拜咋，又冇肚痛、陰道出血等病徵，憑乜嘢實牙實齒話係宮外孕，仲要即時做手術呀？

專家仲話，如果唔係宮外孕，醫生唔可以擅自決定動唔動手術，寧願分開兩次手術進行。即使病人接受過全身麻醉，亦唔表示胎兒有危險，生畸胎嘅機會亦唔高。聽咗專家解釋，乜都明解晒，呢單嘢直情謀殺咗一條寶貴生命。

醫生擅作主張固然難辭其咎，但係院方同埋醫管局管理混亂更係罪無可恕。以前有人話，公立醫院醫療事故多多，無論大人細路都走唔甩，依家睇嚟，未出世嘅胎兒照樣會中招。不妨再舉一例，有個懷有雙胞胎嘅婦人今年七月喺廣華醫院剖腹生產，其中大孖被醫生拉斷大腿骨。院方唔單止唔認錯，仲話胎兒係玻璃骨，你話過唔過分？叮！

莫太第一次懷孕，不知幾開心，連「奶粉會」都入埋，依家無端端冇咗個胎，梗係唔甘心啦，佢要求院方交代事件，但係院方一直冇回覆。

其實，莫太都唔好對院方抱太大希望嘞。係人都知道，醫管局乜都唔叻，最叻係醫醫相護，幾嚴重嘅事故都可以大事化小，小事化無。對呢單刮錯宮，佢哋又點會認真查處？

叮！正因為班官僚阻頭阻勢，以前發生咁多醫療事故，最後都不了了之。遠嘅唔講，就講明愛醫院見死不救事件，食衞局局長周一鑊應承過會查處，事後咪又係高高舉起輕輕放下！

所以呢，要想刮錯宮等悲劇唔再重演，就要對公共醫療體制做一次大手術，好似割毒瘤咁將班唔稱職嘅高層割清光，咁就一天都光晒嘞。