本文重點
龍門結業，茶客惋惜，而在過去日子對龍門更屬不離不棄的，就是門前的報紙檔，現酒樓結業在即，報紙檔也被迫榮休。「龍門結業後，呢度肯定好快會拆，到時搭晒棚架，仲點會有客人嚟買報紙雜誌吖？呢度無可能再擺檔做生意。唉，無辦法啦，唔到我控制！」現時六十多歲的報檔負責人李伯，慨嘆這個由父母留傳下來的檔口，無法抗衡時代巨輪。
早於六十年代，李伯當時只有十多歲，就要到報檔「打點」。「當年賣報紙方法同依家唔同，我擺晒啲報紙喺地下賣，又試過拎住一大疊報紙就咁兜售，後來先至放喺個木箱上面擺賣。仲有一樣嘢依家未必好多人知道，當年啲人嚟飲茶，有啲客唔買報紙，而係租報紙。租一份要『斗零』，另加『斗零』按金，啲租客飲完茶就畀番份報紙我，我畀番『斗零』按金佢哋！」
60年代設消夜茶市
「六十年代尾亦係酒樓最旺嘅時間，當年更有消夜茶市，但係茶客乜人都有，成日有人喺門口打架，我第二朝返嚟，就會見到檔口鄰旁有一大攤血！」雖然是數十年前的事，但李先生現時說起仍感興奮，但談到將來計劃時即很茫然，只道報攤養活一家大小，稍後惟有向政府申請另覓地點繼續擺檔。