尋日係粵劇日，康文署喺文化中心有個粵曲演唱會，請嚟唔同嘅粵劇名伶獻唱，除咗吸引大批粵劇迷外，就連民政事務局副局長許曉暉同八和會館主席汪明荃都有去捧場。許曉暉話對中國戲曲有好濃厚嘅興趣，但就一直冇機會學。
原來許曉暉喺幾個月前已經秘密學唱粵曲，仲話係學唱子喉，雖然唔係學咗好耐，但都覺得幾好玩。佢咁忙，會唔會好似「書法派」班女高官咁成日走堂㗎？佢話請老師上佢屋企單對單教，相信就冇呢個問題嘞！可能佢拜師日子尚淺，講起成績係點就有啲怕醜，連師承何人都唔肯透露，不過佢話遲啲一定搵機會向汪阿姐學吓嘢喎！
唔知係咪聽到許曉暉賣口乖，汪阿姐大讚佢身為高官肯學粵曲好難得，仲話遲啲等西九文化區正式開幕，可以叫佢去做表演嘉賓，身體力行推動藝術發展。