香港人出名識飲識食，仲會捐窿捐罅去搵食，咁啱尋日喺沙田馬場有賽事，又見到全國人大常委、馬會大董范徐麗泰喺度監場，問起佢有乜好介紹，佢話雖然鍾意食嘢，但就唔會揀飲揀食喎！咁又係嘅，均衡飲食，對身體都好啲啦！
跟住又撞到對食有要求嘅馬會董事李國棟醫生，佢話食過一味廣州葵花雞，肉香骨脆，連范太亦搭訕話葵花雞源自南沙葵花園，有次佢跟廣東社團總會副主席楊志紅去南沙食過，從此一試難忘，事關啲雞唔係食一般飼料，而係全部用矜貴嘅葵花種子餵大，加上通山走，運動量勁，所以煮熟後皮香肉嫩，雞骨特軟，仲完全冇皮下脂肪，啱晒佢同李國棟呢類「冇乜Quota」嘅人食喎！
