全球大學都爭相提升國際排名，但中文大學候任校長沈祖堯尋日喺大氣電波話唔應該以研究論文數量、籌錢能力或學生賺錢能力等量化大學嘅成績，大學排名更加唔係衡量嘅指標。吓！咁用乜嘢尺去量度呢？
跟住佢話學生個心先係最重要。依家啲大學生成日畀人話淨識吃喝玩樂，畢業後就只顧搵錢，對社會嘅事不聞不問，沈祖堯話好希望可改變呢個情況，將來佢培育出嚟嘅學生要「有soul（靈魂）有heart（熱誠）」，唔止讀得書搵到錢，仲要關心時事回饋社會，咁先係真正嘅大學生，否則大學只係間技術訓練學校，根本唔可以做到教化下一代呢個使命。呢把咪係佢把尺囉！係用嚟度學生嘅心嘅。
佢話上任後會全力提高佢哋對社會問題嘅觸覺，仲話會用多啲非官方渠道同學生交流，例如摸吓咖啡杯底談心，大家先講到真心話。
對於早前接受學生質詢時，有啲學生發表具挑戰嘅言論或尖銳問題，佢唔覺得學生反叛，反而覺得佢哋只係比較關心社會或有強烈嘅正義感，但作為知識分子都應該識得尊重別人，畀人覺得你有修養先得。