立法會資訊科技界議員「IT豪」譚偉豪讀番書出身，閒來又鍾意踢波同搞足球隊，生活睇嚟相當西化，但原來佢非常熱愛中國傳統文化，除咗會用《道德經》嚟教仔之外，每個禮拜佢都會做一次中醫針灸同耍太極，話可以令到自己腦筋靈活啲同心情平和啲，對立法會工作好有幫助。
入得IT呢行最緊要係腦筋靈活轉數快，佢話每次針完之後都覺得成個人醒咗好多，於是每個禮拜六都嚟畀醫師「糟質」一次，次次都拮到成頭鋼針，成個科學怪人咁先夠過癮。早兩個禮拜有兩聲咳，醫師就幫佢喺心口同喉嚨拮多兩針。
除咗針灸之外，佢隔兩日又會去搵另一位隱世太極高手楊師傅學耍太極。佢話跟咗楊師父超過五年，最初學太極拳同推手，近期就「升呢」轉學太極劍。佢自言以前相當性急，學太極令自己心情平和咗好多，喺立法會遇到有人掟嘢爆粗，都唔會激親。