行政會議召集人CY梁振英有三個仔女，大仔傳昕今年二十歲，喺大學讀幹細胞，佢最近跟隨導師去咗瑞典，咁啱「光纖之父」高錕下個月會去瑞典首都斯德哥爾摩領取諾貝爾獎，CY吩咐個仔要搵個小角色做吓，例如做帶位，希望有機會接近高校長，或者可以同佢影番張合照添。
不過影唔影到合照係次要，更重要嘅係囝囝有機會置身諾貝爾頒獎現場大開眼界，話唔定激發佢第日都要攞番個諾貝爾獎。
CY兩個囡囡齊昕同頌昕都喺英國讀緊中學，但佢話同仔女都好接近，佢經常都會飛去英國開會，順便可以喺彼邦見見面。由於經常搭飛機，CY練就一上飛機就瞓着覺嘅本領，絕大多數時候，未等到飛機起飛佢就瞓着，搭長途機連飯都唔使食。