出身英國情報機關軍情六處、近年每逢香港政壇有大事發生例必現身香港嘅前布政司霍德，尋日下晝四點半見到佢同太太喺慣常入住喺金鐘嘅一間酒店check in，冇見一段時間，睇嚟佢精神仍然唔錯。自從本月十八號政改諮詢文件出台後，香港政壇再起風浪，佢唔遲唔早咁啱又出現。

幕後軍師收拾殘局

一直保持住電訊盈科非執行董事身份嘅霍德，以電話回覆查詢時解釋，來港係要出席電盈董事局會議，將會逗留至禮拜四，期間冇計劃同港府或者政界人士聯絡。被問到會唔會約見前下屬「陳老太」陳方安生、李漢奸同淫賤黎，霍德話，以往曾經喺英國倫敦同陳老太以及李漢奸碰過一次面，純屬一般社交活動，之後都冇見過咁話。

唔少政界人士都知，霍德係陳老太嘅「恩師」，有份一手培植陳老太接替自己出任首位華人布政司，回歸之後亦一直同陳老太保持緊密聯繫，被視為陳老太同英國政府嘅傳話人兼幕後軍師。○七年立法會港島補選前夕，霍德現身香港之後，陳老太「唔嫁又嫁」決定參選，泛民嘅甘乃威等亦好聽話咁相繼讓路，本來立立亂嘅泛民陣營一下子變番有規有矩。

近幾年嚟，但凡香港有政壇大事，霍德都冇一次失場。不過世事無常，搞事三人組成員陳老太、李漢奸同淫賤黎喺今次總辭嘅立場上已經陣腳大亂，李漢奸仲承認自己唔識政治添，咁嘅一場鬧劇，幕後軍師要幫手收拾殘局，都唔係咁易㗎。

老實講，唔單止喺○七年陳老太「唔嫁又嫁」參加港島補選之前現身，○三年「七一」五十萬人上街、○五年泛民否決政改方案，期間霍德都有來港。喺政壇呢個咁動盪嘅時候，佢又再現身，仲話此行冇接觸香港政界人士添，真係信不信由你！