小白觀點：食肥啲租畀人賺錢

唔知大家仲記唔記得幾年前香港辦咗個「人體奧妙展」，展出好多甩皮甩骨嘅屍體，全部都係一個德國怪博士哈根斯嘅傑作，佢發明塑化科技將人體煎皮拆骨，做出乜嘢動作形態都得。小白老弟去睇過，覺得一啲都唔奧妙，仲好鬼得人驚添，嚇到發咗幾晚噩夢。

如果講奧妙，哈根斯絕對唔係食物及衞生局局長周一嶽嗰皮，公立醫院直情當人體係迷你倉，做完手術之後，體內導管、紗布乜都有，你話奧妙唔奧妙吖？話唔定遲吓可以活化人體用途，咁大家快啲食肥啲，加大自己嘅實用面積，到時可以出租畀人當骨灰龕賺租，斷估唔會又畀人話違反地契條款啩。

網友觀點......

大發

真係好恐怖，唔敢入公院，信唔過，隨時有入冇出㗎喎。

Ben sir

公院免費贈送紗布、鉗、導管，要乜有乜，問你敢唔敢要～

Tommy

醫護人員可以完全唔發覺有異物留喺病人身體內，紗布咁大張都可以唔拎走，真係冇乜理由！

達達圖

經過咁多醫護人員處理傷口都冇發覺唔妥，證明佢哋做嘢求其，當病人死物咁做！

網址：www.sunsiupak.blogspot.com

阿豪觀點：割錯器官為增空間

打開電視，成日見到迷你倉賣廣告，有個老外着住唐裝衫帶領成棚人高呼公司電話號碼。計我話，使乜嘥錢搵地方擺嘢吖，你自己個身體已經係現成「迷你倉」啦！唔信？睇吓今期醫管局《風險通報》，病人體內原來可以放導管、紗布、金屬圈等物品，真係幾好用o架！

將人體改裝成迷你倉，絕對有好多好處，起碼唔會好似幾年前某銀行咁樣，裝修嘅時候唔小心將保險箱當廢物咁掉咗去堆填區。

老實講，香港應把握機會，發展人體迷你倉業務。咁做唔單止可以廣開財源，第時唔小心割錯病人器官，都可以理直氣壯咁反駁，話增加迷你倉儲存空間，係配合人體迷你倉發展政策！

網友觀點......

尖子

又係《風險通報》？啲內容咁精彩，到底邊度有得賣/攞嘅啫？

匿名

醫療成日失誤，好心政府起多啲骨灰龕啦，死咗都唔使排咁耐隊嘛……

jam紙兒

強烈建議香港發展第七大優勢產業：人肉貨櫃碼頭。

有病呀？

留低紗布喺病人體內，會唔會係因為驚病人做完手術後內出血呀？

網址：www.lukchiho.blogspot.com