曾協助警方安插臥底嘅粉嶺中華基督教會基新中學狂批警方違反保密協議，連累校名曝光。校長仲拎住張爛果報，怒斥該報作嘢，竟然話該校有二十三名學生被捕。但事實係，該校並無任何學生被捕。

又難怪校長咁嬲嘅，成件事實在太荒謬。話說警方今年四月派一名二十三歲師姐混入基新中學，事前講好唔係針對學校，而係透過學校接觸區內有勢力人士。警方應承，校名、學生姓名等資料都會列為高度機密，仲話已經向律政司申請頒令，要求法庭及傳媒將資料保密。

點知警方大隻講，講咗唔算數，令基新中學校名曝咗光。再加上爛果報無中生有，指該校有二十三名學生涉及吸毒被捕，令基新中學形象嚴重受損。

正如校長話齋，學生第日出街會被街坊指指點點：嗱，佢咪就係有學生吸毒被拉嗰間學校嘅囉！經過今次事件後，學校收生會唔會受影響仲未知，不過老實講，每一位家長都想自己仔女入一間有良好聲譽嘅學校，係咪？

其實，安插臥底會有風險，基新中學又點會唔知，佢哋只不過係諗住為社會出一分力，先至答應協助警方打擊毒品，勢估唔到反被警方跣咗一鑊，唔怪之得校長猛話自己太傻啦。

警方出錯，開頭仲死撐，直到尋日先至死死氣認衰補鑊，自認做漏招，冇就保密協議向法庭申請禁制令。

叮，警方玩忽職守，唔止令警隊冇晒諴信，而且令政府公信力大打折扣，但搞笑嘅係，當局仲話件事唔會影響下月推行嘅校園驗毒計劃。其實，校園驗毒計劃會唔會受影響，睇吓調查就知。

大埔青年協會訪問咗區內四百名中學生，結果顯示，只有約一半受訪學生同意將驗毒結果通知家長、校方及社工，比八月份大跌近兩成。該會直言，臥底行動資料外洩事件，增加公眾對驗毒計劃嘅憂慮。

所以話呢，當局無謂再自欺欺人嘞，校園驗毒計劃本來就唔係好多人支持，加上今次爆出洩密醜聞，學生及家長唔驚就假。叮，依家最緊要係快快趣趣查明洩密原因，向公眾作出交代，無謂再死撐啦！