本報揭發有一百八十八個網民喺facebook組成「我要練習自殺」群組，警方後知後覺摷群組發起人，成員就話「玩吓啫」。唉！後生仔女好玩唔玩，學人玩自殺，睇怕遲啲要派女臥底入學校搗破自殺黨，以免破壞煲呔曾千萬人口美夢！

小白老弟喺度要勸吓學生哥唔好搵自殺嚟玩，譬如話燒炭咁吖，依家啲炭有排都未燒得着，到着起火嘅時候，分分鐘肚仔餓想BBQ完至算；仲有跳樓，更加唔好亂試，咪以為就咁可以一了百了呀，依家消防飛將軍好專業㗎，一招迷魂鎖，再加幾下手刀，企跳唔成反而畀人打到變豬頭，圍觀市民拍爛手掌，仲畀人拍片放埋上YouTube，你話幾瘀皮呢！

網友觀點......

可憐天下父母心

小朋友真係吖，少少挫折就要生要死，擔心死啲父母呀！

cc

依家啲細路難搞到極，對佢哋好又唔知，睇嚟全港家長要整番個facebook群組交流吓點教仔。

小小So

呢股自殺歪風，九成九喺日本、韓國傳過嚟啦，睇嚟殺傷力仲大過豬流感呀！

nutcracker

所以呢，好多人都唔敢生仔，養到咁大至自殺冇咗，呢啲就真係叫嘥米飯嘞！

網址：www.sunsiupak.blogspot.com

阿豪觀點：留意有冇做世界群組

有青少年喺facebook發起自殺群組，有人更號召喺下個月二十一號「採取行動」。乜家陣啲後生仔咁唔珍惜生命㗎！不過咁，細嘅就話唔識諗啫，大嘅都唔好得幾多，警方竟然只係集中同元朗一個地區嘅校長開會。大佬呀，全港其餘十七區啲後生仔女唔會睇唔開㗎？

講番青少年自殺問題，其實都係要多得facebook呢項偉大發明。後生仔靜雞雞自己「柄」埋一邊自殺，發覺嘅時候已經太遲，依家佢哋事先張揚，咁都仲有得幫吓佢哋。話時話，唔知銀行劫匪又會唔會透過facebook成立「我要練習做世界」群組呢？咁警方辦案都容易啲，斷估唔使太醒目都可以應付得嚟。

網友觀點......

小順子

如果唔係有報紙爆出嚟，警察都唔會做嘢，到時如果係真嘅話，就死得人多咯。

匿名

班友仔如果有膽自殺，使咩搵人陪？

我唔想死

呢一代嘅人思想扭曲晒，唔多唔少都係由互聯網、msn同facebook搞成㗎……

尖子

點解佢哋唔加入facebook入面嘅「尊賢敬老」群組呢？

網址：www.lukchiho.blogspot.com