28/11/2009

播放本新聞相關短片

政情:泛民保甘威擺Miriam上枱

白鴿黨嘅立法會議員甘乃威涉嫌求愛不遂解僱女助理事件,泛民主派當初堅持施以「極刑」,以最嚴重可以取消議員資格嘅譴責議案形式處理,動機惹嚟各方揣測,尋日終於露出狐狸尾巴。

泛民出爾反爾,以冇原告為由,要求取消譴責議案。最離譜係泛民為做呢場戲,不惜擺同僚上枱,當初係佢哋要求內會主席Miriam劉健儀捱義氣做動議人,點知尋日佢喺內會知會喺十二月九號提譴責動議,吳靄儀同李卓人等群起提出,以女事主唔願意協助調查同罪證不足以令甘乃威辭職為由,要求撤回動議,真係人又係佢哋,鬼又係佢哋,Miriam畀佢哋玩到陀陀擰。

建制派嘅劉江華同葉劉淑儀則力挺Miriam,指咁做對Miriam唔公道,Miriam亦不忿被玩,企硬按原計劃喺十二月九號提出動議,唔畀泛民得逞,有嘢到時至講。

泛民會後表明將喺十二月九號提出取消譴責動議嘅動議,一向喜歡攪局嘅「法律超人」謝偉俊亦預告會提同樣議案,咁即係話,泛民連環兩次擺Miriam上枱。

泛民為「救甘」不擇手段,Miriam提完譴責甘乃威動議後,係咪應該考慮再提動議,譴責泛民罔顧道義呢?