尋日見到滙控亞太區主席鄭海泉夫婦約咗一位銀行家喺中環食晏，面對杜拜咁大鑊，鄭大班都話唔識睇，仲笑笑口咁話：「再講一陣連飯都冇胃口食呀！」呢個時候仲識得講笑，唔通今次杜拜拖債問題唔大？轉頭見到滙控亞太區行政總裁王冬勝，佢就冇咁老定，話滙控仲未完全掌握杜拜嗰邊發生乜嘢事，要睇定啲先喎。

商界又點睇杜拜拖債危機呢？新昌營造集團常務副主席王英偉話杜拜世界財困已流傳一段時間，相信係發展得太急導致形成泡沫，但唔能夠以偏概全話成個中東都有問題，好似沙特阿拉伯發展相對穩定。王英偉喺中東都有投資，但杜拜就冇，所以未受影響，不過佢都呼籲投資者小心，事關股市調整未必會一日完成晒，後市升升跌跌都唔出奇。