28/11/2009

播放本新聞相關短片

政情:曾偉雄懶理警隊洩密

最近警方派女臥底去中學調查校園販毒案,但竟然將校名外洩,導致粉嶺中華基督教會基新中學無辜受屈,搞到保安局局長李少光尋日第一時間向學校致歉。

尋日咁啱喺中環撞到警務處副處長曾偉雄食晏,梗係捉住佢問點解警隊近期發生咁多麻煩嘢啦,點知佢輕描淡寫咁話:「小風波嚟啫,大家抱住為社會市民服務,喺程序上微調番啲就冇問題啦!」

如果微調吓程序就冇問題嘅話,點解接二連三發生資料外洩呢?咁就唔使搞到李少光要出嚟道歉啦!