依家唔少家長為求子女入讀名校而孟母三遷，但原來呢種風氣早喺四、五十年代已存在，當年讀中三嘅吳家瑋，原本住喺港島，就係因為仰慕培正嘅校譽，舉家搬嚟九龍區，喺培正讀到中學畢業。

吳家瑋有大堆物理學碩士、博士銜頭，但原來佢中學時係個文藝青年，最鍾意歷史，對理科反而冇乜興趣，不時投稿去校報嘅學生園地，賺取每篇兩至三蚊嘅稿費去買蝦片等零食添！佢話因為當時文科生都被視為「搵唔到食」，佢至會揀讀理科，後來至發現到對物理嘅興趣。

培正今晚會舉行校慶晚宴，仲會宣布籌款十億元用嚟發展培正，吳家瑋話如果母校開到聲，佢都會幫手做說客，協助籌款喎！