劉太做稅務局揸fit人逾七年，期間都算幾好彩，連官場中人都話佢腳頭好，一來喺佢任內庫房幾度退稅，而舊年稅收有逾二千億元，係六十年前稅務局成立時稅收嘅一萬四千倍，可以話佢係「吸水局長」。

但金融海嘯巨浪冚過嚟，劉太早前都話去年度市民同企業一共拖欠庫房超過七十二億元稅收，實際金額仲打破歷年紀錄，仲有啲睇淡今年經濟難復甦添！

班政府高官呢幾個月係咁唱好經濟見曙光，原來根本陰霾未散，尋日仲爆出杜拜債務爆煲，恒指出現恐慌性拋售，人人擔心第二波金融海嘯殺到。

喺咁嘅情況下，朱鑫源升職係咪腳頭唔好呢？若果杜拜真係唔掂，咁全球經濟連帶香港都會受到重創，咁出年拖欠稅收嘅款額可能再創新高，朱鑫源都算係黑仔局長囉！