旅發局主席田北俊今年聖誕終於可以休息吓，飛去日本北海道過一個白色聖誕，但玩三日就要趕番嚟主持除夕倒數。佢話今次過去主要去滑雪，睇吓啲滑雪場啱唔啱細路仔玩，話想同個孫農曆新年再去，享受吓爺孫樂。
講到今年難忘事之一，田少話四月嗰陣飛去澳洲買咗兩隻馬，當時澳幣疲弱，兌港紙只係五蚊六毫，比起○八年時已平咗三成；點知近日睇番匯率兌成七蚊，雖然匹馬未操又未出賽，但帳面已賺咗。但佢話自己改名就麻麻哋，之前啲愛駒叫親乜乜武士，成績都一般，其中一隻兩歲新馬下年一月就會落船運港，佢話為改名都好頭痛。
田少尋晚撐完長實「1881」聖誕樹亮燈儀式後，就拿拿臨去文化中心，原來係秘書Lily結婚之喜，田少舉家包括太太同仔女都有到賀。問新娘子畀幾多分老細，Lily畀一百分滿分，田少就回敬一百零一分畀Lily。點解畀咁多？原來為咗要Lily應承嫁咗人都要繼續幫佢喎！