話說立法會交通事務委員會尋日開會傾小巴、巴士安全問題，正當一大班議員追問運輸署點樣改善司機嘅休息時間之際，會議廳突然傳出好響嘅手機鈴聲，人人都打咗個突，事關無論記者、官員同議員都好清楚，會議期間全部手機都要靜音或者熄機，絕對唔可以有手機響，唔係實畀主席鬧到飛起。

正當大家估緊邊個咁斗膽挑戰立法會規矩時，發緊言嘅黎以德突然停咗落嚟，原來「真兇」就係佢，佢拿拿聲㩒停部手機，由於鈴聲只係響咗幾秒，大家都冇乜點理佢，由得佢繼續發言。

點知佢講唔夠幾句，手機又響過，原來黎以德只係㩒停一下，冇熄到部手機，而電話對面嗰位仁兄認真唔生性，咁急搵署長，於是乎成場人望實黎以德。黎以德惟有低頭「搞機」，好尷尬咁話「等我熄咗佢」，但唔知係咪愈急愈亂，足足成十幾廿秒先搞掂。

煲呔曾上樑不正下樑歪

工聯會嘅議員「阿王」王國興都算禮待黎以德，即時笑住叫主席補番啲答問題秒數畀佢咁話。但不嬲唔好老脾嘅「長毛」梁國雄就唔理得你係邊個，即刻寸黎以德，話佢連手機都管唔掂，點管到巴士公司呀？

其實，黎以德又幫唔落，事關佢明知要開會就熄手機啦，咁樣響法好唔尊重班議員啫；再講，佢連一句sorry都冇講過，可以話根本冇悔意，連基本禮貌都冇。

仲記得早幾年煲呔曾喺內地同雲南省省長開會，手機無端端響起，仲要又係雙響炮連響兩次，都唔知係咪上樑不正下樑歪，佢啲下屬亦係唔熄機去開會。煲呔曾當時賴係推銷電話，之後政府就加快立法規管錄音嘅推銷電話，今次黎以德響手機，唔知可以賴乜呢？唔通又係畀啲寂寞嘅推銷員整蠱？