台北市政府不負眾望，對挑戰社會道德底線同公眾容忍限度嘅行為絕不手軟。台灣壹淫媒旗下「動新聞」利用虛擬動畫渲染色情暴力，前日畀市府重罰五十萬新台幣。點知壹淫媒道歉當食生菜，賊性不改，呢頭發聲明道歉，嗰頭繼續淫賤，只刪咗部分色情內容，其餘內容仍然不堪入目。台北市政府尋日再出重手，罕有咁對「動新聞」罰多五十萬，兩日合共罰款一百萬。當局警告壹淫媒，再明知故犯，就會「一行為一罰」，唔單止可以日日罰，必要時仲會勒令停業。當局仲宣布，為保障青少年身心健康，政府轄下學校同幼稚園一律停止訂閱台灣爛果報。

淫賤黎喺台灣犯眾憎，已經變咗人人喊打嘅過街老鼠。尋日，包括傳媒觀察組織、婦女組織同教師組織在內幾十個民間團體，打住「拒絕爛蘋果」、「拒看動新聞」、「動新聞侵害人權」嘅標語，齊齊操去台灣壹淫媒抗議。有民眾怒斥淫賤黎：「如果你的妻子、小孩遭受性侵、暴力、自殺案件，你還願意讓妻小看動新聞，讓他們受到二度傷害嗎？」

鬧得啱！政府、市民同仇敵愾，齊齊捍衞社會道德，向淫賤說不，呢啲咪叫正氣囉。台北市長郝龍斌嫉惡如仇，對荼毒青少年嘅淫賊窮追猛打，呢啲咪叫有承擔囉。「郝青天」果然實至名歸，順應民意，前途無量。

可惜吖，人哋台北正氣凜然，邪不壓正，香港就淫賊橫行，正不壓邪。喺香港，青天唔使旨意嘞，烏煙瘴氣就大把。

叮！壹淫媒咁多年嚟除咗宣揚色情、暴力，破壞傳媒生態，荼毒青少年，未做過一件好事，利誘陳健康北上深圳嫖妓做假新聞、偷拍女藝人換衫、將藝人床照輯成特刊促銷，單單臭不可聞。

對呢個以反中亂港為己任，靠裸體、屍體搶眼球嘅傳媒敗類，港府唔為民除害不特止，仲百般縱容包庇。好似香港有得賣嘅台灣《壹週刊》，曾經報道大陸所謂吃嬰潮，淫審處已裁定為三級淫褻，結果司法機構居然係咁意輕輕罰款二萬銀就算數。

港府縱淫，司法護淫，淫賤黎仲唔如魚得水，有咁淫做咁淫，有咁賤做咁賤咩。如果唔係港府姑息養奸，壹淫媒呢隻香港臭通街嘅爛蘋果，點可能跨過海峽去台灣做「過埠淫賊」，繼續害人害物吖。

壹淫媒宣淫販賤，台北有正氣，見一鑊罰一鑊；香港班港英餘孽就百擒百縱，唔怪得香港愈來愈邪啦。叮！