小白觀點：另類指數實攞滿分

煲呔曾政府管治信心指數低到出奇，十九個管治項目嘅評分，竟然有十六項唔合格，又畀人話弱勢政府。小白老弟要講番句公道說話，好似話「公平競爭」、「穩定房屋政策」、「改善貧富懸殊」呢啲項目，仲使講嘅，梗係衰到貼地啦，擺到明就係明做煲呔曾啦！喂，你唔好加埋「煲呔曾靚仔程度」落去？受訪者即刻嘔添呀！

當局要洗底，不如搵御用傳媒圍威喂搞番個自我感覺良好嘅管治信心指數，嗱，項目包括「公立醫院事故多籮籮」、「親疏有別益自己友」、「公營機構大花筒」、「貧富懸殊」、「害民增困」同「老無所養」等十九幾項，喺煲呔曾政府管治下，呢啲項目一早超額完成啦！

網友觀點...X）...

[　小順　]

煲呔曾呀煲呔曾！我哋畀咗好多次機會你喇，唔知係你資質平庸吖，定係你班局長跣你，好自為之啦！

[　B仔　]

份份施政報告都冇料到，叫人邊爭得落吖！

[　Ceci　]

煲呔曾！本來我都睇好你，依家就好失望，政府爆出嚟嘅嘢鑊鑊新鮮鑊鑊甘，冇眼睇！

[　Ah榮　]

煲呔曾不如返屋企管治錦鯉罷啦！

阿豪觀點：落力保障淫賤言論

有調查發現煲呔曾喺十九個管治項目裏面，市面評分竟有十六項唔合格，睇嚟佢嘅民望真係低處未算低。

正如網友阿九話齋，其實煲呔曾管治肥佬，都唔算係咩新聞，奇就奇在煲呔曾仲有三瓣係合格喎！查咗一大輪，終於畀豪伯發現，原來係「選舉自由公平」、「政府廉潔」同埋「保障言論自由」呢三瓣。

提起「保障言論自由」，香港真係認第二未必有人敢認第一。大家睇吓，有啲傳媒長期宣淫販賤，最多都係被罰雞碎咁多；佢哋喺台灣照辦煮碗，台北市長立即暴喝一聲，重罰佢哋五十萬新台幣。你哋話嘞，香港保障淫賤言論自由表達，唔係全球第一咩？

網友觀點...X）...

[　九両菜　]

吓，乜煲呔曾仲有三項管治評分合格？搞錯呀，個調查似乎有啲問題喎……

[　廢鰻　]

其實解決呢個問題好簡單嘅啫，佢唔do走人，咪以後唔使考試唔合格囉！

[　廖尚恒　]

唔係啩？煲呔曾管治肥佬都係新聞？大家有目共睹啦。

[　匿名　]

好想抗議，可唔可以今年唔交稅？將稅款全部捐畀公益金冇咁嬲！