「光纖之父」高錕獲得諾貝爾物理學獎之後，港人無不興奮，好多人睇完有老人癡呆症嘅高錕同太太溫馨嘅生活片段後，仲好感動添。早幾日，高錕太太黃美芸低調返港，尋日出席一個退休教工晚會時，更首次面對香港傳媒感謝香港人，叫大家放心，仲話：「佢身體其實唔差o架，係記憶力唔好啫。」
黃美芸隻身返港係為咗探一班舊朋友兼舊同事，佢話如果同埋高校長一齊返嚟可能唔係好方便，佢喺美國屋企有仔女照顧，自己都會成日打電話返去同高校長傾偈。問到下個月十號就會舉行諾貝爾頒獎禮嘅準備時，黃美芸話，佢當日會着旗袍，致謝辭亦都寫得七七八八，內容就要保持神秘，到時先揭曉喎。
不過，佢哋家吓都未決定到時係由高校長自己致謝辭，定係由佢代講。頒獎禮臨近，佢哋兩夫妻開心之餘，並唔算好緊張，因為：「佢（高錕）四十年嚟已經拎咗好多獎㗎啦，係呢個特別啲啫。」