鏞記老闆甘健成識飲識食，仲有每日飲人稱「雀仔威」嘅蘇格蘭威士忌Famous Grouse嘅習慣，一日唔飲甚至會唔舒服。家吓一支雀仔威閒閒哋都要二千蚊，甘老闆點樣飲法呢？仲原來有套獨門秘方，唔同天氣有唔同飲法：夏天加冰，冬天配茶，飲酒兼養生，一樂又一得。
睇番甘老闆支雀仔威，似乎同其他嘅有啲唔同，因為佢支酒嘅酒樽招紙上寫住「KINSEN KAM」，即甘老闆嘅英文大名。呢支酒原來有段古，事緣甘老闆不時落酒樓同客人傾偈，年幾前，佢見到有班外國人喺鏞記食飯，傾落覺得啱嘴形，就主動送咗支雀仔威畀佢哋。點知過咗一排，佢竟然收到兩箱寫住「FAMOUS KINSEN KAM」嘅雀仔威，先知道當日個客原來係雀仔威嘅高層。世界名酒寫住自己個名，甘老闆呢支雀仔威真係威晒囉！