行政會議成員楊敏德尋日又接到一份新工作，將接替前行政會議成員羅仲榮做理工大學校董會主席，出年一月一號起生效，任期三年。現任行會非官守成員當中，梁智鴻掌港大、張建東掌科大、梁振英就管城大，李業廣都係啱啱卸任嘅公開大學校董會主席，話煲呔曾唔係「親人善任」都唔信。不過曾朋友做大學校董會主席，楊敏德係第一人。
楊敏德同煲呔曾交情深厚，亦係早前曾朋友飯局嘅其中一員。早喺○一年，當時仲做緊財政司司長嘅煲呔曾帶商界代表去大西北訪問，其中一個團友就係做紡織同製衣生意嘅楊敏德。當時煲呔曾喺新疆見到楊敏德嘅棉花田開得好，仲封楊敏德做「棉花公主」添！
之後，煲呔曾將楊敏德招攬入行會，家吓又做埋理大校董會主席，孭住四項公職嘅楊敏德喺家族生意之外仲全情投身公職，果然係曾朋友噃！