本文重點
富豪集團太子女羅寶文同海洋公園保育基金主席陳晴係好朋友，仲friend到討論過做「親家」添！事關佢哋兩個都係愛狗之人，不時帶埋佢哋嘅「仔女」（愛犬）聚會，久而久之見出感情嚟，不過，寶文嘅愛犬身形細小，講起同陳晴嘅愛犬做夫妻，佢忍唔住話︰「Bodhi太矮啦，高攀唔起，擔梯都唔掂！」陳晴都話，整定佢兩個做唔成「親家」。
未諗再搵工
陳晴啱啱去四川探完另一個「愛女」熊貓「晴晴」，依家晴晴兩歲零九個月，已經有三個男朋友仔，其中一個叫「歡歡」，經常畀「晴晴」蝦，連佢做「媽咪」都睇唔過眼，笑囡囡係脾氣王。「囡囡」性格係咪似「媽咪」呀？陳晴即時面紅紅咁話︰「呢樣就唔好講啦！」
之前為咗大熊貓基地重建基金籌款而出書嘅陳晴，為咗寫好本書，辭咗份高薪厚職嘅投資工作，依家本書再版，個基金又已經達到一半目標，但陳晴話依家幫緊聯合國兒童基金會同海洋公園保育基金做慈善工作，夠晒忙，所以未諗再搵工。