「叫人自焚人哋都要聽？」

白姐姐要狙擊嘅對象係黃毓民、長毛，或者係咁，佢尋日嘅參選記者會除咗公布挑戰目標外，政綱、選舉經費，甚至落邊個區都未敲定。阿Paul喺白姐姐獨挑大樑開記者會後先現身，明撐白姐姐出征，仲講咗個奇怪嘅理由：「立法會地下夫妻檔就多啫，正式夫妻檔仲未有過，試吓都好吖！」

忽然參選嘅白姐姐強調，今次參選唔係博見報，而係不滿黃毓民同長毛，仲羅列兩人幾宗罪，譬如喺議會公然爆粗、掟蕉、掃枱等，既影響莊嚴議會，又教壞細路；鏡頭前挑戰高官，但掃完枱後，轉個頭又同高官拍膊頭，做戲咁做；只關心自己嘅議會言行有幾多人報道、網上有幾多人點擊，白姐姐夭心夭肺咁話：「都唔知佢哋係真心關注民主、監察政府施政，定係為自己？」

白姐姐仲話佢哋處理五區總辭都好過分：「泛民自己都未傾掂，（社民連）就搶先公布，冇理由你叫人自焚人哋都要聽㗎！」所以白姐姐決定「做自己認為應該做嘅事」，佢估計今次出選實有人支持，即使選舉經費唔夠，佢都唔擔心。

除咗白姐姐下海，阿Paul師傅金勞詹已揚言陪泛民玩，佢哋如果一個狙擊九龍西、一個瞄準港島區，呢兩區嘅補選對手想唔頭痕都難，事關佢哋兩個志不在選舉，而係狙擊特定人選，到時泛民想借補選搞公投嘅如意算盤恐怕打唔響。