垃圾電郵有幾纏擾，相信唔少市民都領教過，就連立法會醫學界議員「怪醫」梁家騮都不勝其擾。依家政府規管網上銷售健康食品，法例多，執行少，過去五年，每年嘅檢控數字只有一至五宗。怪醫尋日喺立法會大會聽到呢堆數字，笑笑口話難以置信，仲自爆以佢為例，每日已經收到至少三宗偉哥推銷廣告啦，仲問衞生署會唔會連電郵促銷廣告都規管埋。怪醫冇透露最後點樣處理呢啲偉哥廣告，但睇佢一副厭惡樣子，應該就唔係受益人嘞。
怪醫咁玩得，連咁私隱嘅事都攞出嚟講，食物及衞生局副局長梁卓偉亦玩埋一份，一臉嚴肅咁答：「我要澄清，好少收到壯陽藥廣告。」話如果收到，會向衞生署投訴跟進，叫怪醫都咁做。梁卓偉咁講，都係話畀人聽，佢唔食偉哥嘅。
