上個月發表嘅港台前途諮詢文件，確保港台嘅政府部門地位不變，完全無視早前公共廣播服務檢討委員會提出要將港台變成獨立公共廣播機構嘅建議，惹嚟唔少人非議。檢討委員會前委員梁天偉尋日出席一個公開論壇時，講起呢件事都表現得好冇癮，仲話唔使旨意要佢入局做顧問委員會成員添！
梁天偉話由○六年開始，檢討委員會用咗十四個月嚟研究同撰寫報告，點知重點建議全部不被政府採納，雖然政府話有參考過佢哋份報告，但實情同將份報告「掃落垃圾桶」冇分別。
諮詢文件話要成立一個顧問委員會監察港台質素，可能會再搵資深傳媒工作者梁天偉入局。但佢就耍手擰頭話依家唔為名唔為利，教書教得開開心心，諗都唔會諗再幫政府手喎！
咁又係，見過鬼都怕黑啦，為乜咁辛苦幫政府做咁多嘢吖！