喺立法會行政管理委員會通過立法會新大樓嘅室內設計圖前夕，秘書處特登將設計圖同用料樣辦擺出嚟畀議員同記者參觀。工聯會嘅議員「阿王」王國興就留意新大樓間餐廳坐到幾多人、樓梯安唔安全，同議員夠唔夠房用。
素來形象前衞嘅議員葉劉淑儀參觀圖則時，突然問起有冇搵過風水師睇睇個設計同布局，仲話其實佢唔信邪，只係佢以前做過嘅紀律部隊相信，為求安心啫！佢又對於將來新大樓有健身室好滿意，事關開完馬拉松式會議後有地方畀佢伸展吓。
視立法會為家嘅立法會秘書長吳文華就話，理解記者關注點樣捉到班議員，原來班議員都好關注點樣畀記者捉到，所以特意做咗啲小改動方便記者。此外，大約今年聖誕節前就有議員辦公室、記者室設備嘅示範單位畀大家睇，而立法會仲會問政府攞番同以往立法局有關嘅文物，將來擺喺新大樓畀市民參觀。