尋日係賭王何鴻燊八十八歲壽辰，前晚三太陳婉珍同四太梁安琪喺醫院陪伴賭王至凌晨迎接生日。尋日賭王正日生日，二太藍瓊纓送果籃作禮、各房子女亦帶嚟蛋糕同不同美食，為賭王炮製一個美味嘅到會壽宴。
何家子女尋日絡繹不絕出現養和醫院為賭王祝壽，向來性感示人嘅何超雲好罕有咁收起性感，打扮高貴見爸爸，一直保持笑容嘅佢，同行助手更拿着一袋美食，其後佢再派司機送上另一袋美食同一束鮮花；二太則派人送嚟一個果籃，期間又見有工作人員攞箱橙上病房；四太梁安琪則派人送上天使蛋糕；媳婦羅秀茵則親手自製咗一個芝士蛋糕，美食源源不絕供應。據了解，何超儀送咗佢自己嘅唱片T恤同佢老公陳子聰隊樂隊「廿四味」嘅T恤畀爸爸。
多名何家成員都喺衣着上花盡心思，好似何超蕸攞住紅色手袋、二太藍瓊纓同何超儀都穿着紅色上衣，紅色確實增添不少氣氛。向來對傳媒不薄嘅何家，尋日特別為傳媒安排窩心嘅飯菜，每位傳媒都獲贈一個巨型壽包，令大家都感受到賭王大壽嘅歡樂氣氛。