地政總署早前指幾間私營骨灰龕違反地契條款，但就拒絕提供詳情，而營辦商仲同政府就「人體遺骸」嘅定義有分歧，仲可能會對簿公堂添！地政總署執法態度曖昧，而直屬上司、發展局局長林鄭月娥則採取逃避嘅方法，早前喺一個記者會度，先搵新聞秘書擋駕，跟住想快閃，最後畀記者逼出一句「一定會支持地政總署進行地契嘅執法工作。」竟然咁閃縮咁撐地政總署。

甘威陳淑莊夾擊

正所謂是福不是禍，是禍躲不過，睇怕林鄭閃唔得幾耐。點解咁講？事關喺下個月九號嘅立法會大會上，議員提問鬧雙胞，一條係由白鴿黨甘乃威提出嘅口頭質詢，另一條係公文袋陳淑莊提出嘅書面質詢，都係追問政府會點樣規管私營骨灰龕嘅問題，例如要地政總署提供規管私營骨灰龕嘅名單、地契條款係點、近萬名買咗「有問題龕位」嘅市民，政府會點善後？呢次林鄭不單止走唔甩，簡直係插翼難飛，要嘔晒啲料出嚟。

外界話林鄭係「好打得」嘅局長，再加上佢冇副局長，所以到時佢要親自回應議員嘅質詢，肯定要企定捱打，若果佢有乜郁嚟唔到，而佢個替工局長又答到一舊雲，肯定畀啲議員打得更慘。

其實喺私營骨灰龕嘅質詢上，議員背後都有爭持。相信大家仲記得早前公文袋幫中環班擦鞋匠，甘威走去踩場，仲邀功話自己跟咗呢件事好多年；跟住到灣仔爆水管，甘威又想領功，搶先約水務署班官去佢辦事處解畫，點知最後畀水務署跣咗一鑊，呢次佢又同陳淑莊爭入Ｑ，算甘威好彩可以搶先做口頭質詢。

之不過，甘威都唔好開心得太早，因為眾所周知，班高官最拿手係打官腔，可以估到林鄭會將畀陳淑莊嘅書面回覆，同一內容再搬番出嚟答甘威，到時石頭鑽唔出血，咁就嘥氣啦！