小白觀點：點都唔及聯航咁牙煙

民航處使逾千萬公帑買咗套抵港航班管理系統，以為點先進啦，嘿，點知差啲搞到發生空難。硬件唔掂，不過好彩香港嘅空管人員軟件非常專業，先至可以化險為夷，否則下季嘅《空中浩劫》電視系列，香港國際機場做硬主角都得嘞。

不過如果講牙煙，睇怕有排都唔及聯合航空，呢間航空公司出名多甩漏，本身係《空中浩劫》常客，嗱嗱嗱，早前美國有個高級行政人員搭頭等艙，有職員竟然話佢着得太隨便唔畀上機，呢個乘客真係有所不知，聯航機艙出煙呀、老鼠走來走去呀，甚至機師懷疑醉酒遭起訴，千奇百怪乜都有，上唔到機何止唔使嬲，直情要感謝嗰位職員不殺之恩啦。

網友觀點......

BuBee

聽見都牙煙，一個訊號錯，可能幾架機就撞埋一齊㗎嘞。

飛　兒

唔講都唔知民航處用新嘢，仲不知不覺做咗試驗品，好彩冇出事咋！

花師奶

機器隨時會壞，都係人手可靠啲，空管人員好嘢～！

Cherbe

點解唔做好模擬測試先呀，咁快搵實況測試，叫人點夠膽搭飛機呀。

網址：www.sunsiupak.blogspot.com

阿豪觀點：民航處又搵前線祭旗

民航處耗資逾千萬公帑買咗套抵港航班管理系統，點知上個月試用階段已爆出錯誤航班訊息危機，好彩空管人員發現得早立即改以人手操作，先至避過一場九霄驚魂咋。喂，人命關天㗎，點可以好似細路哥玩泥沙咁試吓試吓㗎？

早排醫管局派員去外國考察豐田車廠運作，畀人插到暈。唔知民航處係咪因為冇去外國考察至出事呢？應花嘅公帑又唔花，唔應使就使咗去，吹脹。講開又講，睇落民航處嘅辦事作風又同醫管局有幾分相似。聽講民航處管理層為咗推卸責任，對幾位空管人員施以停牌處分。又玩「刑不上大夫」，求其搵幾件前線出嚟祭旗，仲話唔係向醫管局偷師？

網友觀點......

賺粒糖輸間廠

使幾千萬買啲垃圾返嚟……仲不如一個小職員。

大江東去

啲咁重要嘅航空系統，應該不斷測試，到覺得可以信賴唔出錯先試用㗎嘛，點解可以咁兒戲！

大地之鬼

就算唔出意外，攪亂航班升降，delay或cancel都麻煩啦～～

勤

個出錯系統，係咪成日同機師講：Delay no more！

網址：www.lukchiho.blogspot.com