咦，條件都幾吸引噃，仲唔拿拿聲租番個檔位！之不過，邊度會有咁大隻蛤乸隨街跳吖，原來成件事係個大騙局。食環署口甜舌滑，氹咗租戶落疊就反面唔認帳。叫佢哋拆雞檔裝修，佢哋就話從來都冇應承過咁樣做。做官做到咁賴貓，真係要寫個服字。叮！

咁仲未算最離譜，最過分嘅係，食環署訂咗好多騎呢政策。比如，有條禁令係唔可以賣飯。係人都知道，現時煲飯都用電飯煲，根本唔使開火，更加唔會有油煙，但係檔攤可以賣魚蛋、豬皮、蘿蔔、牛雜、碗仔翅、粥、麵、甜品，就偏偏唔准賣白飯。問食環署有乜嘢理由，佢哋又講唔出，總之唔畀你賣就唔好賣，唔係就係違例！大佬，唔通做官大晒咩？

有條規定仲無厘頭：唔可以裝冷氣。大家都仲記得，往年禽流感爆發期間，好多街市就係因為空氣唔流通，焗死咗好多雞。雞都頂唔順，何況係人？租戶惟有自己裝冷氣，但係食環署又話：對唔住，唔可以裝。因為冷氣機散熱器會影響街市氣溫咁話。咁就大鑊嘞，大熱天時，舖頭裏面成三十度以上高溫，食客入嚟見到冇冷氣，走都走唔切啦。

咁仲未算慘，最慘嘅係食環署規定食肆嘅營業時間係由朝早六點到夜晚八點，八點之後一律收檔，因為街市要清潔，唔容許個別攤檔繼續營業喎。咁班租戶就畀佢哋玩死嘞，八點之後正係食肆最旺嘅時間，唔畀開檔，點做生意呀？

食環署打死狗先講價，搞到班租戶冇啖好食，有啲人做咗幾日就摺埋，但係有啲租戶拎咗大拿拿幾十萬出嚟搞裝修，唔甘心血本無歸，惟有死撐。唉，鬼叫自己信錯人咩，早就講過o架啦：政府靠得住，豬乸會上樹。

本來呢，雞檔轉食肆係件好事，將空置雞檔租出去，可以令庫房增加收入，租戶亦可以降低經營成本，市民又可以買到比較平嘅食品。一家便宜三家着，何樂而不為。

之但係，件好事落到食環署署長卓永興呢班官僚手中，就搞到一鑊泡。講鬼咩，咪以為佢哋真係想方便市民，佢哋只係想卸鑊啫嘛，雞檔租咗出去，就關人個關，話之你班租戶喊苦喊忽啦。想知道乜嘢叫做涼薄官僚？有辦睇喇！叮！