後浪冚過前浪

呂明華年前同廠商會副會長林大輝拗手瓜爭奪立法會議席不果後，抱住屢敗屢戰嘅心態爭取做廠商會會長，雖然佢選舉前講過會以平常心對待呢次選舉，仲明言輸贏屬平常事，但選舉結果一出，黃友嘉以七十一票對十六票大比數擊敗佢，呂明華亦難掩失望之情，離開時刻意混入人群之中，睇到記者影相，即時舉起手上嘅公文袋遮面，之後更加輕聲叫記者唔好影佢相。不過佢都大方表示接受選舉結果，仲話日後會繼續為社會服務添！

講番新任會長黃友嘉，唔少投票嘅會董都對佢讚不絕口，當中以佢嘅老友林大輝最開心，大輝盛讚佢表面斯文，實際上「好打得」，係會長嘅合適人選。大輝仲揚言會辭去廠商會副會長一職，專注立法會事務，而黃友嘉就理好會務，實行雙劍合璧喎！