泛民五區總辭係咪搞得成仲未知，但煲呔曾嘅心戰室已作最壞打算，同埋應該點應付。其中一個一廂情願嘅諗法，就係對五區補選給予「冷對待」，任由泛民候選人喺冇對手下自動當選，又或只派出一堆不成氣候嘅人同泛民對撼，目的係令變相公投嘅意義大打折扣。不過，建制派嘅心態就唔係咁睇，而係希望可以攞番幾席，甚至令泛民喪失立法會三分一議席嘅政改否決權。
據建制派嘅內部評估，五區中以九東同新西勝算最高。前者兩派嘅實力一向相當接近，泛民計劃派出嘅公文袋袋巾傑，上屆得票仲少過同區嘅白鴿黨李華明，如果做過九東票后嘅工聯會陳婉嫻真係東山復出，袋巾傑嘅選情實凍過冰水。
泛民計劃喺新西出選嘅社民連「大舊」陳偉業，上屆只係掹車邊包尾當選，加上社民連近年不斷爆出醜聞，只要建制派能團結一致、集中票源，絕對唔難將大舊撼低。
建制派認為除港島較難撼外，九西同新東都有爆冷機會，就算最後評估未必贏到，改派新人出戰練吓兵都有贏冇輸。睇嚟呢場大戰點都避唔到，心戰室與其坐喺度諗縮數發夢，不如積極啲研究吓點樣幫建制派部署，夾計撼低泛民啦。