肥亨喺○二年出任問責官員後，工作壓力不斷增加，直至○四年第四季開始出現頸肩痛，情況仲愈嚟愈嚴重，據聞當時出席立法會會議都係忍痛死頂。直到○五年初前立法會議員田北俊娶新抱，肥亨忍痛出席婚禮，同場嘅立法會議員梁劉柔芬見狀，於是好心介紹咗位註冊中醫師張勇畀佢。

為求脫苦海，肥亨每個禮拜幫襯一至兩次，進行密集式針灸同推拿，半年後情況大大好轉，頸肩鬆咗好多。

張醫師透露當年肥亨因為工作壓力大，令手部出現麻痹，仲有啲神經緊張，但經過長時間針灸同推拿後，情況大大改善，依家肥亨每一至兩個月都會嚟睇吓，當係調理身體，但好明顯冇做局長後，肌肉冇咁緊，鬆咗好多，唔使再按得咁用力。