咪以為淨係草根派議員同工會代表先關注有關問題，兩名「五散人」成員、保險界嘅陳健波同醫學界嘅「怪醫」梁家騮，已分別入紙申請喺下月初同月中，提出題為「推動工作與生活平衡的新職業文化運動」同「立法規定標準工時」嘅動議，齊齊撈過界變身勞工代言人。

怪醫向來關注佢啲醫生選民嘅超長工時問題，曾不惜同醫管局鬧上法庭。佢話經過單官司後，體會到任何業界爭取勞工權益都唔能獨善其身，要團結整體社會一齊爭取，而單靠僱傭合約保障係唔夠嘅，最穩陣都係透過立法推行。佢又話好多社會、家庭同個人健康問題，多少都同打工仔工時太長有關，值得關注。

佢搵人研究過其他國家嘅法律，發現大部分已就工時問題立法，香港實在好落後，並強調標準工時唔同最高工時，唔代表僱主唔可以喺雙方同意下要求僱員加班趕工，最重要差別係立法後僱主一定畀足超時補水，唔可以好似依家咁側側膊唔多覺。

KK爭啲失威

陳健波就話佢個動議係希望各個業界都同保險界一樣，注重工作同生活上嘅平衡，推動更彈性嘅上班方式同時間，令打工仔有多啲時間做運動同陪屋企人，提升生活質素、個人健康同家庭和諧。

好彩KK早過佢哋提出有關動議，否則分分鐘畀突然撈過界嘅怪醫同陳健波搶晒分。佢兩個忽然「勞工」，唔通連工聯會嘅選票都想撬？