雷曼迷債爆煲，幾萬香港人中招，好多人血本無歸，一殼眼淚，苦主又示威又靜坐，除咗要求賠償之外，仲要求追究相關人士嘅責任。金管局煞有介事調查，搞咗成年，先至有一宗處分咁大把，仲係搵個最基層嘅員工開刀，而所謂處分又不痛不癢，唔怪得被指為「假停牌」喇。

聽吓雷曼苦主大聯盟召集人陳光譽點講，佢話今次裁決嚟得太遲、太輕，相對於數以萬計苦主蒙受嘅金錢同埋時間損失，實在微不足道。佢仲話，最令人失望嘅係銀行同埋管理層都毋須受罰，難以令市民信服。

講得啱。部分銀行前線員工為咗爭取業績，確實可能會誤導顧客，所以，當局處分相關員工，冇人會反對，之但係咁，成件事裏面，唔通銀行管理層一啲責任都冇？正如有立法會議員話齋，有關處分只係假處分，而且銀行及其管理層都唔使受罰，對銀行起唔到阻嚇作用。議員要求當局加快調查同懲處，唔可以淨係搵前線職員做替罪羔羊。

其實，講到責任，銀行固然責無旁貸，而作為監管機構嘅金管局及證監會更加係難辭其咎，如果銀行及職員要受處分，金管局及證監會都唔可以例外喇，係咪？

一句講到尾，雷曼事件暴露咗香港金融管理體制漏洞百出，但最搞笑嘅係，煲呔曾仲好意思自吹自擂，喺香港吹仲未夠，仲要去新加坡吹，居然喺各國政要面前大講香港因為有處理九七年亞洲金融風暴經驗，加上港府推出咗優化銀行同金融制度嘅措施，所以對金融海嘯處理得比其他地區好，經濟復甦亦比其他地區快咁話。唔知嘅畀佢嚇死，知道嘅就畀佢笑死。

姑且唔講金融海嘯爆發時港府點樣陣腳大亂，淨係睇吓佢哋處理雷曼事件亂晒大龍，就足以證明煲呔曾係吹水唔抹嘴。唉，香港官員面皮之厚，真係要寫個服字。

事到如今，最緊要唔係搵替罪羔羊，而係亡羊補牢，吸取教訓，快快趣趣堵塞制度漏洞，完善監管機制。唔係嘅話，莫講話做唔到國際金融中心，連做中國金融中心都唔使旨意。叮！