小白觀點：爛果報抄到風生水起
政府成日叫人搞創意產業，好多人以為絞盡腦汁度新嘢就叫創意，咁就錯晒啦。查實依家最有創意嘅就係抄人嘢，電視台綜藝節目抄三、四手外國節目；電台潮人抄內地畫家抄到笑大人個口；至於歌星就更離譜，由曲詞、封套到衣着、舞台乜都熟口熟面，所以「侵權之都」並唔係浪得虛名。
不過抄嘢都好講功夫㗎，好似爛果報咁，一係就唔抄，一抄就原封不動照copy，結果抄到風生水起，抄到零成本搞傳媒產業，嗱，呢啲咪叫做專業囉！大家千萬唔好覺得奇怪，人哋嘅編採部門臥虎藏龍，平時成部影印機咁款，查實話唔定全部都係外星「炒派」嘅變形金剛嚟㗎！
網友觀點......
tanya
咪係囉，唔抄人邊有創意呀！正所謂天下一大抄，唔抄就笨啦！
咪講笑
要數抄嘢王國非我哋祖國莫屬啦，連外國知名歌手都要買番一兩件A貨返去威吓。
Louis
邊有咁多創意吖，講到尾咪又係抄，香港好多政制政策咪又係執人口水尾。
超超共
抄嘢都有分高手同低手嘅，抄得核突不如咪抄啦，最死就係抄完唔認，仲要話係原創。
網址：www.sunsiupak.blogspot.com
阿豪觀點：打擊侵權選擇性執法
最近海關又發現店舖非法載入軟件破壞PSP同Wii原有嘅保安裝置，等玩家可以喺改裝遊戲機使用盜版遊戲軟件。枉政府成日話要將香港發展成「創意之都」，點知翻版遊戲就長玩長有。
唔係講笑，豪伯有次喺旺角好×商場，見到有個電視台男藝人喺度選購翻版遊戲光碟，最好笑係，嗰個男藝人戴住大大副黑超，以為遮住半邊面人哋就唔認得佢，我當時真係有衝動想走埋去問吓佢有乜翻版推薦！
不過點都好，海關都叫做肯做吓嘢捉吓啲改game嘅舖頭吖，反觀我哋東方報業集團旗艦網站on.cc嘅網上新聞報道，夠成日畀人盜用侵權啦，投訴極又唔見當局咁積極做嘢！
網友觀點......
匿名
請尊重政府尊重個別知識產權。
廢鰻
改遊戲機呢樣嘢好難杜絕，有供應有需求，除非海關連買嗰個都拉埋啦，咁或者都仲有啲阻嚇力。
步gen雲
拉得一間，仲有千千萬萬間改機舖，拉得幾多呀？
咀咀香圓
冇呢啲改機舖，邊有得畀你玩翻版玩得咁過癮？正版要成三、四百蚊一隻㗎！
網址：www.lukchiho.blogspot.com