桂林山水甲天下，富豪酒店太子女羅寶文尋日出席一個慈善網站活動時透露，全家稍後會去桂林旅行，因為佢嫲嫲快九十歲大壽，佢仲話：「嫲嫲行得走得好健康，轉數好快，仲快過我！」雖然寶文冇講全家有幾多人一齊去桂林，但羅氏家族人才濟濟，去親睇怕都有幾十人。
富豪趙世曾女兒趙式芝（Gigi）尋日都有出席呢個名為「我開」嘅慈善網站活動。Gigi話自己同爸爸一向有捐錢做善事，但認為親身體驗會好啲，佢過去曾參與過兩次探訪，分別去非洲同湖南，並喺兩地逗留五個禮拜至兩個月。佢話喺湖南見到有個老婆婆仲要孭柴，睇到佢忍唔住喊出來；而當時正值水災發生後，有小朋友將啲短到用唔到嘅鉛筆攞去曬乾再用，難怪佢話見聞令佢好感動。
遲吓Gigi打算約埋堂兄趙式慶（趙世光孻仔）組團去東北探訪喎。趙式慶經常到訪內地山區，特別係東北鄂倫春少數民族地區。