泛民拋出五區總辭嚟要脅政府，嚇唔嚇到人未知，但就引到建制派爭崩頭。政圈風傳，建仔打算吼實港島同九龍西兩區，欲借補選谷新人；上次選舉喺新界東同新界西失去地盤嘅富貴黨就打算收復失地，由前主席田北俊同胞弟田北辰上演兄弟復仇戰；加埋新論壇同其他建制派人士，僧多粥少下，總辭下集肯定係五區混戰。
泛民一方亦為總辭動干戈，社民連同公文袋唱雙簧夾白鴿黨盡快扑錘，搞到白鴿黨前不得後不得，另一邊嘅建制派更鬥餐死，富貴黨希望田氏兄弟藉補選告捷重振聲威，但建制派咁多山頭，少不免要拗吓手瓜，揚言會陪泛民辭職、參選港島嘅「金勞詹」詹培忠尋日就話，聽聞建仔嘅蔡素玉有意再戰港島，佢或會轉戰新界西，咁咪變成同田二少火星撞地球？我哋問蔡菜子，佢話一定唔會選，不過，到時有冇變數就好難講。
新論壇龐愛蘭亦盛傳蠢蠢欲動選新界東，如傳聞屬實，就會同田少狹路相逢。九龍東形勢較明朗，陣營內最有實力嘅係陳婉嫻，九龍西聽聞建仔想藉補選催谷油尖旺區議會主席鍾港武。不過，家吓講乜都太早，呢場對決幕後點會少人指點呢？