Tanya話件旗袍係喺上海訂造，有喜慶事先拎出嚟着，雖然買咗七、八年，但依家都係咁啱身，可以想像Tanya嘅身材一直都冇變！商務及經濟發展局常任秘書長蔡瑩璧撐場都不忘任務，披住本地品牌嘅紅色披肩，實行以身作則支持本地經濟。前環境運輸及工務局局長「冬姑」廖秀冬就着大紅色外套撐場，華麗又端莊。冬姑話最近除咗湊孫，仲忙住搞上海嘅環保項目，成日都要周圍飛喎！

阿涂話好大壓力

尋日一雙一對嚟見證主席婚禮嘅仲有立法會議員涂謹申同陳克勤，阿涂仲話個婚禮好Warm好感動，令佢覺得有好大壓力，驚遲啲冇人哋做得咁好喎。不過佢已早有準備，話會搵特別嘉賓嚟做棟篤笑表演，實行要搞一個難忘歡喜嘅婚禮！