城中唔少富豪二代部署接棒，曝光率漸高，華人置業主席劉鑾雄兒子、華人置業董事劉鳴煒就一直低調，被認為係做人踏實、成熟同節儉嘅富豪二代，平時有豪華房車唔坐，鍾意搭大眾化港鐵代步，而且熱心公益，經常去做義工。
尋日周末，竟然喺港鐵銅鑼灣站渣甸坊出口見到劉鳴煒喺寒冷天氣下幫協康會賣旗，着住淺藍色短袖衫嘅佢話好怕醜，叫我哋唔好影佢，仲直話直說：「（我）第一次賣旗！」尋日朝早氣溫好低，但佢都着住短袖衫，手上嘅旗賣咗大半，一直賣到十二點賣旗時間完結後至同保鏢離開。街上嘅路人，睇怕都唔知呢個義工係身家億億聲嘅富豪二代。
年僅二十九歲嘅鳴煒學富五車，先後喺英國攞到法律學士同法律哲學博士學位、倫敦經濟及政治學學院法律碩士學位，又喺美國紐約考獲律師牌，並擁有特許財務分析師資格。