香港搞環保、能源新政，自然不可與外國比。好似美國咁，奧巴馬上任即表示將在未來十年內，投資一千五百億美元用於清潔能源產業。香港都有投資，譬如最近政府以五千萬元資助學校添置設施轉為「中央派飯」，被指添煩增亂，事關學校冇空間，供應商要加人手，膳費必增，家長肯定有意見。

政府施政向來諗到就做。搞中央派飯，教師個個已因教改無所適從做到氣咳，如今又要中央派飯加重工作，供應商又因加人手要加膳費，直頭係政府出豉油，學校及家長出雞！政府撥完錢就印印腳，而長期善後就由學校去歎。有家長的建議更可行：倡用環保飯盒，或強制所有飯盒供應商採用環保飯盒更實際。

民間智慧比環保署的官大爺官大娘務實。筆者常光顧的一間快餐店，因生意太好，原先用可清潔再用的鐵叉刀匙，如今亦已改用一次過木筷膠叉。這方面，政府又有甚麼好橋去規管快餐店多用可清潔再用的器具？

香港搞環保有姿勢冇實際，停車熄匙、徵膠袋稅、慳電膽計劃、中央派飯全是小眉小眼的動作，即使搞電動車亦是雷聲大雨點小，嘻哈做騷，成效自然看不到、抓不起！