當局前幾日建議修訂《版權條例》，未獲授權而主動向公眾傳播版權作品嘅人，如將相片、電影或音樂上載至數碼平台，即使非牟利，只要傳播程度足以損害版權擁有人，亦須負上刑事責任，最高刑罰係入獄四年以及每件作品罰款五萬元。

祭出「嚴打」呢招，即係話侵犯版權已經天怒人怨，港府焗住要做番啲嘢啦。之但係，如果以為當局真係會做嘢，咁就實在「太天真太傻」咯。

《版權條例》唔係今日至生效，至弊負責執法嘅海關有法不依，執法不力。呢嗱，「東方做，蘋果盜」喺香港已經街知巷聞，淨係舊年九月到今年二月短短半年，壹淫媒旗下《蘋果日報》網絡版「蘋果動新聞」，涉嫌持續抄襲東方報業集團旗艦網站on.cc網上新聞報道至少三十幾次，平均每個禮拜閒閒地抄一兩次。

東方今年二月向海關舉報爛果報網絡版侵權，海關到依家都無聲無息，當冇事情發生一樣。港府官員日前回應立法會議員質詢嗰陣，居然以唔評論個別案件做擋箭牌，想蒙混過關。

叮！如果當局有心打擊侵權行為嘅，啲文抄公又邊會咁無所顧忌吖。海關話，由○七年到今年九月一共收到一千八百宗侵犯版權舉報，當中近五百宗涉及網上侵權。網上侵權比例咁高，證明問題已經相當嚴重。但海關竟然連網上侵權嘅檢控數字都攞唔出，咁又點證明佢哋做咗嘢吖？

正如有法律界人士話齋，本港對付網上侵權罪行嘅法例比其他國家一啲都唔輸蝕，但係唔等於當局執法有效率。一般刑事侵權個案調查需要四到六個月，東方舉報爛果網侵權，海關拖咗八、九個月仲未有行動，直頭偏離晒執法軌道。有法唔執，就算再修訂多十次八次，《版權條例》咪又係無牙老虎，廢紙一疊。

其實東方畀壹淫媒侵權已經好耐咯。早喺一九九六年十月六日，壹淫媒旗下嘅爛果報娛樂版就擅自盜用當時東方報業集團旗下《東方新地》嘅「王菲懷孕乘飛機」獨家相。東方告爛果報侵犯版權，獲判勝訴，但法庭居然判東方支付巨額堂費，東方要上訴到終審法院至得直。

叮！淫賤黎誨淫誨盜，壹淫媒慣偷成性，全香港都知啦。咁多年嚟，佢哋多次侵犯東方版權，多次畀法庭判罰款，但一直死性唔改。呢次海關對東方網上新聞畀壹淫媒抄襲嘅投訴處理一拖再拖，遲遲未有跟進，壹淫媒呢隻文雀仲唔愈偷愈狼咩！

叮佢個鎯鎯！司法部門縱容，執法部門懶理，當局口口聲聲保護知識產權，不過係做戲啫。壹淫媒靠偷靠抄有運行，侵權愈侵愈快樂，港府仲話發展創意產業，收皮罷啦！