小白觀點：意男俄妹應做司局長

東亞運唔聲唔聲嚇你一驚，聽講話搵咗班曾經喺建國慶典大騷長腿嘅女民兵，喺開幕禮中做舉牌，港男當然係大飽眼福啦，但係當中都唔係冇隱憂㗎，因住有幾個突然提出酷刑聲請，嗰時唔慌唔創造傳奇一刻。

講開東亞運，單係個名已經對南亞外勞好唔公平喎，佢哋山長水遠走到嚟香港，特區政府唔搞個「南亞運動會」都算嘞，仲要立例唔畀佢哋喺度搵食，算唔算係歧視先？奧巴馬訪華，黑人總統拖兩個華裔部長，呢啲咪叫普世價值囉！最衰就係奧巴馬話美國不尋求將政治體制強加於任何地方，否則香港三司十二局換班，兩個意籍俊男，三個日本妹，四個俄羅斯金絲貓都唔錯。

網友觀點......

阿晞

咩原來係佢做舉牌呀？死囉，我依家先知~東亞運都冇咩feel嘅~

忠哥

好彩請外勞咋，如果搵甩皮甩骨港女出場，實嚇死人，你睇年年港姐質素就知啦。

豬仔

話晒係香港搞東亞運，用咁多內地人，唔湯唔水，主場身份都變客席啦！

嘈嘈閉

香港口靚模都幾出名吖，揚名日本喎，點解唔搵一兩個做引導員嘅。

網址：www.sunsiupak.blogspot.com

阿豪觀點：女民兵揸旗再救票房

提起外勞，大家可能頭都暈一暈。你諗吓呀，之前攞行街紙嘅人士都可以做嘢，已經引起好大關注，搞到政府都要急急修例，莫講話直頭輸入外勞咯。

不過唔使驚，原來只係東亞運開幕禮，請咗兩個內地女民兵嚟做開幕禮嘅旗手。有啲人會大驚小怪，話東亞運明明係香港人嘅「傳奇一刻」，點解又由內地人擔任旗手呢？

咁講就唔啱數啦。成個東亞運明明水靜河飛，吉祥物又嚇到啲細路嗌阿媽救命，都係多得有劉翔、郭晶晶、林丹等內地體壇明星過嚟撐場，你個票房至唔會太難睇咋，家陣再幫你，搵兩個女民兵嚟幫你哋揸旗，唔該你哋飲水思源啦！

網友觀點......

路中拾遺

佢哋都唔係香港人嚟嘅，有鬼用咩？今年香港搞，竟然冇香港人做吓代表仔喎，好笑~

阿東妹仔

去旺角搵兩個潮童，用潮語、懶音發表開幕致詞，咁至係香港特色。

匿名

算啦，本身對東亞運都冇興趣，由咩人舉牌都冇所謂啦~~

小卜

你話真係做嘢嗰啲外勞就話啫，擔大旗之嘛，由得佢哋做飽佢囉，反正當唔到飯食！

網址：www.lukchiho.blogspot.com